កណ្តាល៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាការដាក់ទណ្ឌកម្មបង្កកទ្រព្យសម្បត្តិលើមន្ត្រីជាន់ខ្ពស់កម្ពុជាដោយសហរដ្ឋអាមេរិកកាលពីកន្លងទៅ គឺគ្រាន់តែជាសញ្ញានយោបាយប៉ុណ្ណោះ និងថាទោះដាក់៥០០ដងទៀតក៏គ្មានឥទ្ធិពលអ្វីដល់កម្ពុជានោះទេ។

ថ្លែងក្នុងពិធីចុះពិនិត្យការដ្ឋានសាងសង់ព្រលានយន្តហោះអន្តរជាតិថ្មី នៅ ក្នុងស្រុកកណ្ដាលស្ទឹង ខេត្តកណ្ដាល សម្ដេចតេជោ ហ៊ុន សែន បានថ្លែងថា សម្ដេចអរគុណចំពោះអន្តរជាតិដែលមិនទទួលលុយពលរដ្ឋកម្ពុជាដាក់ក្នុងធនាគារខ្លួនដោយថាការមិនទទួលនេះបានធ្វើឱ្យពលរដ្ឋកម្ពុជាបង្វិលលុយមកវិនិយោគក្នុងស្រុកដែលធ្វើឱ្យមានការរីកចំរើនដូចបច្ចុប្បន្ន។ សម្ដេចថាច្បាប់ស្ដីពីលទ្ធិប្រជាធិបតេយ្យដែលអាមេរិកដាក់កន្លងមកគ្មានឥទ្ធិពលនោះទេ។ 

សម្ដេចតេជោថ្លែងថា៖ «អារឿងដាក់ទណ្ឌកម្មនៅ បរទេស ទោះបីប្រកាស៥០០ដង ៥០០ជាតិ ការដាក់នេះជាសញ្ញានយោបាយប៉ុណ្ណោះទោះបីដាក់មកលើខ្ញុំ ខ្ញុំឌឺឱ្យទៀតអ្នកណាភ្លើណាស់ឱ្យគេយកឱ្យអស់ហ្មងទៅ កុំឱ្យវាពិបាកពេក។ […] អ្នកឯងអនុម័តក៏អនុម័តទៅស្អីបន្ដិចមកគំរាមនេះគំរាមនោះអើ! គំរាមទៅ គេគំរាមមួយជីវិតទៅហើយខ្ញុំមិនខ្វល់រឿងច្បាប់ប្រជាធិបតេយ្យអីហ្នឹងទេ។

បច្ចុប្បន្នមានមន្ត្រីជាន់ខ្ពស់នៃរាជរដ្ឋាភិបាល៣នាក់ហើយដែលត្រូវបានសហរដ្ឋអាមេរិកដាក់ទណ្ឌកម្មបង្កកទ្រព្យសម្បត្តិដែលមាននៅ សហរដ្ឋអាមេរិករួមមានមេបញ្ជាការកងអង្គរក្សលោក ហ៊ីង ប៊ុនហៀង មេបញ្ជាការកងទ័ពជើងទឹក លោក ទៀ វិញ និងអគ្គនាយកនៃអគ្គនាយកដ្ឋានសម្ភារបច្ចេកទេសក្រសួងការពារជាតិ លោក ចៅ  ភិរុណ។

កាលពីថ្ងៃទី៣ ខែធ្នូកន្លងទៅ សហរដ្ឋអាមេរិកប្រកាសថាខ្លួននឹងរៀបចំបញ្ជីឈ្មោះអ្នកដែលអាមេរិកចាត់ទុកថាជាអ្នករំលោភសិទ្ធិមនុស្ស ពុករលួយ និងបំផ្លាញប្រជាធិបតេយ្យតាមរយៈច្បាប់ប្រជាធិតេយ្យរបស់ខ្លួន ដែលថានឹងប្រកាសឈ្មោះនៅសប្ដាហ៍ក្រោយ។ ទោះជាយ៉ាងណាសម្រាប់អ្នកវិភាគទំនាក់ទំនងអន្តរជាតិបានចាត់ទុកថាអាមេរិកកំពុងដើរតួរជាអ្នកចាត់ចែងពិភពលោក និងកំពុងប្រើប្រាស់អំណាចរបស់ខ្លួនបំពានលើអធិបតេយ្យលើរដ្ឋឯករាជ្យ៕